AIIB សន្យាផ្ដល់ថវិកា ២ ពាន់លានដុល្លារ ដើម្បីគាំទ្រដល់ការអភិវឌ្ឍហេដ្ឋារចនាសម្ព័ន្ធ និងថាមពលនៅកម្ពុជា

ធនាគារវិនិយោគហេដ្ឋារចនាសម្ព័ន្ធអាស៊ី (AIIB) បានប្រកាសពីការប្តេជ្ញាចិត្តផ្ដល់ថវិកាចំនួន ២ ពាន់លានដុល្លារ ដើម្បីគាំទ្រដល់ក្របខ័ណ្ឌកិច្ចសហប្រតិបត្តិការសម្រាប់ប្រទេសកម្ពុជា (CCF) ឆ្នាំ ២០២៦-២០៣០ ដែលគ្របដណ្តប់លើគម្រោងធំៗក្នុងវិស័យថាមពល ដឹកជញ្ជូន និងការតភ្ជាប់ក្នុងតំបន់។ រាជរដ្ឋាភិបាលកម្ពុជាបានបញ្ជាក់ថា នៅត្រឹមឆ្នាំ ២០៣០ ថាមពលកកើតឡើងវិញនឹងមានចំណែករហូតដល់ ៧០% នៃប្រភពថាមពលជាតិសរុប ក្នុងគោលបំណងឈានទៅសម្រេចបាននូវអព្យាក្រឹតភាពកាបូនក្នុងរយៈពេលវែង។ ប្រធានធនាគារ AIIB បានសង្កត់ធ្ងន់ថា ថាមពលស្អាត និងការអភិវឌ្ឍហេដ្ឋារចនាសម្ព័ន្ធ នឹងក្លាយជាវិស័យកិច្ចសហប្រតិបត្តិការដ៏សំខាន់ ដែលជួយឱ្យកម្ពុជាបង្កើនសមត្ថភាពប្រកួតប្រជែងទាំងក្នុងតំបន់ និងពិភពលោក ព្រមទាំងជំរុញកំណើនសេដ្ឋកិច្ចប្រកបដោយចីរភាព។